تجربتي مع الصبر.. متضيعش وقتك | بقلم (طوني أيوب)

من أهم الخبرات دي مبدأ كنت عايش بيه طول حياتي؛ وهو (الصبر مفتاح الفرج)، والحمد لله بعد كل السنين دي اكتشفت إن المفتاح مكسور

خبرات كتير الواحد اكتسبها في السنة دي؛ بس للأسف من الصعب أتكلم عنها كلها

خبرات

باقي القليل وتنتهي سنة ملعونة مليئة بالخبرات؛ منها اللي كان مُفرِح، ومنها اللي كان مُوجِع.

حابب أشارككم بعض الخبرات دي، وسامحوني لو كلامي رخَّم شوية.. بس هو حقيقي.

من أهم الخبرات دي مبدأ كنت عايش بيه طول حياتي؛ وهو (الصبر مفتاح الفرج)، والحمد لله بعد كل السنين دي اكتشفت إن المفتاح مكسور، والجُمَل بقى من نوعية:

(اصبر تنول).. (اتقل تاخد حاجة نضيفة).. (في التأنِّي السلامة و في العجلة الندامة).. (طول البال يهدم الجِبال).. (الصبر مفتاح الفرج).. (فاقد الصبر قنديل بلا زيت).. (إذا كان الصبر مُراً فعاقِبته حلوة)

معلش.. أنا آسف لكل محبي هذه الجمل العميقة..

لقيت إنه يا خسارة الوقت اللي ضاع في الصبر.. يا خسارة البدائل اللي استخدمتها بسبب الصبر، والوقت اللي ضاع في البدايل دي

متضيعش عمرك

يا حبيبي عمرك ده اللي بيضيّع فرص كتير بتروح منك، علشان سيادتك قاعد في انتظار الحاج "فرج".

الصبر حلو لما يكون مافيش حل غيره، لكن غير كدة الصبر تضييع وقت.

أنا واحد من الناس فضلت مستني وصابر على حاجة معينة أكتر من ٤ سنين.. الحاجة دي بعد ما اتحرَّكْت وابتديت أمشي بسرعة في طريقها، وفعلاً وصلت.. لقيت إنه يا خسارة الوقت اللي ضاع في الصبر.

ومع إني وصلت في الآخر؛ بس بعد كل الصبر ده بندم على كل دقيقة ضاعت مني من غير ما آخد خطوة.

بندم على المكان اللي كان المفروض أكون فيه من سنين، وغيري كان فيه.

كام مرة ضيَّعت فرصة شغل علشان مستني يرقوك في شغلك؟!

كام مرة ضيَّعت من إيدك شخص مناسب ليك علشان انت في انتظار مُعجزة من السماء؟!

كام مرة ضاع منك حاجة بتندم عليها دلوقتي؛ بسبب إنك حطَّيت قدامك خيار واحد؛ وهو الصبر؟!

إعلان مدفوع

اكتشف عالم كولونيا للعطور والعناية الشخصية.

اكتشف Colonia

أنا مش بقول تكون متسرع

اجري ورا حلمك

أنا مش بقول تكون متسرع.. مش بقول تتخلى عن أحلامك.. بس ما تضيَّعش حياتك في الصبر.

اجري ورا حلمك؛ ومتسيبهوش.

ناخد بقى مبدأ جديد: (الوقت كالسيف؛ إن لم تقطعه قطعك).

بالنسبة للي مش عاجبه الكلام؛ روح اتناقش مع حد غيري.

اقرأ أيضا: العلم أقوى عقيدة زائفة | صانع الساعات المضحك