الطريقة الأمثل لمعاقبة الفيس بوك ومواقع التواصل الاجتماعي

0 0 صفحة أخيرة الخميس، 20 مايو 2021 Edit this post

الفيس بوك بيسجل كل كبيرة وصغيرة انت بتعملها وأكاد أجزم إنه بيسجل كلامك عن طريق المايك واحتمال يكون بيصورك فيديو كمان.

الطريقة الأمثل لمعاقبة الفيس بوك ومواقع التواصل الاجتماعي

(بقلم/ مصطفى أمان)

علامة المتصفح الخفي

بالنسبة لموضوع تقييم تطبيق الفيسبوك على متجر جوجل بلاي وآب ستور هل هو الأسلوب الأفضل لمعاقبة الشركة على عنصريتها أم هل يوجد طريقة أفضل لمعاقبتها؟!

من منطلق إن مجهودنا ما يروحش على الفاضي نبدأ.

اقرأ أيضًا: تركيا.. الصين | مذبحة بارين

في البداية لازم نعرف إن موضوع التقييم ده ممكن يأثر على الأفراد أو الشركات الصغيرة، يعني واحد مبرمج عمل تطبيق علشان يتعرض عليه إعلانات ويكسب من وراه فلما يجيله تقييمات سلبية على تطبيقه هيكون خايف إن المتجر يحذفله التطبيق وبالتالي يخسر فلوس الإعلانات. لكن مع الفيسبوك احنا بنتعامل مع أحد الحيتان اللي حتَّى لو افترضنا إن متجر جوجل بلاي أو آب ستور استجابوا لتقييمات الناس وحذفوا التطبيق، تاني يوم هنلاقي الفيسبوك عمل متجر لنفسه.

زي ما حصل مع شركة هواوي لما جوجل قالت إنها هتحجب خدماتها عن أجهزة هواوي لقينا الشركة عملت متجر لنفسها وحاليا بتعمل نظام تشغيل كمان.

طيب إيه الحل الأمثل اللي ممكن نأثر بيه على الفيسبوك؟ الأول لازم نفهم إحنا بنمثل إيه للفيسبوك وإيه هي أساليب تتبعها لينا.

إاحنا بالنسبة للفيسبوك عبارة عن سلعة، بتاخد مننا كل البيانات اللي تقدر تحصل عليها ثم تقوم بتحليل البيانات دي وبتبيعها للمعلنين. يعني ايه الكلام ده؟!

أنا كأحد مستخدمي الفيسبوك بياناتي الشخصية (اسمي عنواني رقم تليفوني شغلي حتَّى موقعي) هنفرض إني بدور على جهاز لابتوب بمواصفات معينة وسعر محدد.

أول ما ببدأ عملية البحث عن الجهاز سواء من الموبايل أو الكمبيوتر بيبدأ الفيسبوك يسحب الداتا والذكاء الاصطناعي يحللها، تقوم تلاقي فورًا إعلانات ظهرتلك عن شركات قريبة من مكان تواجدك بتعرض أجهزة لابتوب بنفس المواصفات والسعر اللي انت عايزهم.

ووصل بيهم الأمر إن لو في حد له نفس أسلوب تفكيرك بيعرضولك إعلانات عن منتجات هو كان بيبحث عنها فتشعر إنك لما بتفكر في الحاجة إعلاناتها بتظهرلك على الفيسبوك.

طيب بعد ما عرفنا إحنا إيه بالنسبة للفيسبوك، عايزين نعرف هما بيجمعوا البيانات دي ازاي؟ بالنسبة للموبايل بيكون عن طريق التطبيق والمتصفح، طبعًا التطبيق بيسجل كل كبيرة وصغيرة انت بتعملها وأكاد أجزم إنه بيسجل كلامك عن طريق المايك واحتمال يكون بيصورك فيديو كمان.

"الناس هتقول إن موضوع التسجيل ده مش صحيح وإن الأندرويد فيه صلاحيات وأذون التطبيق ما يقدرش يتجاوزها، هقوله مثال بسيط جرب اعمل تليفونك على وضع الصامت المفروض منطقيا أي حد يرن عليك مش هتسمع التليفون، جرب بقى من الكمبيوتر افتح تطبيق البحت عن الموبايل وخليه يرن، هتلاقي التليفون رن"

معنى كده إن التطبيقات تقدر تتجاوز الصلاحيات عادي بدون ما نحس. إما عن تجميع البيانات من خلال المتصفح بيكون من خلال حاجة اسمها ملفات تعريف الارتباط أو الكوكيز، ودي اللي بيتخزن فيها كل بيانات التصفح بتاعتك، تقوم الفيسبوك واخدة البيانات دي. طيب بعد ما عرفنا أسلوب الفيسبوك في حصولها على بياناتنا، نقدر نعاقبها ازاي؟

علشان نعاقبها لازم نطفش المعلنين من عندها، بحيث لما المُعلِن لما ينزل إعلان عندهم ما يلاقيش مردود لإعلانه فبالتالي يروح يعلن في منصة تانية وبالتالي الفيسبوك يخسر فلوس ويرضخ لينا. طيب نعمل كده ازاي؟ أول حاجة لازم نقفل محبس البيانات بتاعتنا اللي الفيسبوك غرقان في النعيم بسببها، فلما نمنع بياناتنا عن الفيسبوك مش هيكون عارف مثلا مصطفى بيبحث عن إيه وبالتالي مش هيعرف يعرض إعلانات لمصطفى، وبالتالي المعلنين مش هيستفادوا وهيطفشوا. وعلشان ننجح في الخطوة دي لازم نفقع عنين الفيسبوك اللي بيراقبونا في كل حاجة.

بالنسبة للموبايل: احذف التطبيق واستخدم المتصفح في فتح الفيسبوك لكن في الوضع الخفي، لأن الوضع الخفي مش بيسجل البيانات في الكوكيز وبالتالي الفيسبوك مش هيعرف يوصل لبيانات التصفح بتاعتك. بالنسبة للكمبيوتر: استخدم الوضع الخفي للمتصفح زي الموبايل، أو استخدم متصفحين مختلفين.. يعني مثلا استخدم الجوجل كروم في تصفحك العادي، واستخدم الفايرفوكس في فتح الفيسبوك. وأفضل الفايرفوكس لأن فيه ميزة جميلة لو فعلتها بيحذف كل الهيستوري وملفات الكوكيز بعد ما تقفل المتصفح تلقائيا وبالتالي الفيسبوك مش هيلاقي بيانات ياخدها منك. وبكده نكون نجحنا في قفل محبس بياناتنا.